Easkáládje loahpahuvvui okta dain stuorimus divrelohkan mii goassege lea dahkkon njealji davimus leanain. Ollislaččat čogge lagabui 400 000 divrriid jagi 2021 nu gohčoduvvon Malaisegillariin, gillarat mat leat dego una vilges tealttat. Divrrit sáddejuvvojit Ölandii gos galget mearridit DNA teknihkain makkár slájaide divrrit gullujit. Bohtosat ledje heammástuhttit, muitala Jörgen Nalisvaara, okta dain geat barget dáinna prošeavttain Norrbottena leanastivrras.
– Leai jáhkkemeahttun, nuppe dáfus go gávnnaimet nu ollu slájaid muhto maid go ledje nu ollu slájat mat eai lean ovdal nammaduvvon, dadjá Jörgen Naalisvaara, ovddasvástideaddji slájaid goziheamis.
Ođđa parasihta gávdnon
Okta báiki man leat inventeren lea Hanhiviittiko šibitnávet Badjedurdnosis. Šibitnávet 1800 logu gáskámuttun gos sláddjejit gittiid ja guođohit ain odne árbevirolaš vugiid mielde. Doppe leat dán rádjái gávdnan 1 600 sierra slájaid ja sullii 40 dain, leat áibbas ođđa slájat Ruoŧas. Lea maid doppe gos parasihtastekel Stenomacrus groenlandicus gávdnui, divri mii ovdal lea beare gávdnon Kanadas, Davviameriikkas ja Ruonaeatnamis.
– Lea deaŧálaš ahte diehtit makkár slájat dáppe gávdnojit ja got dat leat ovdanan. Divrrit čuvvot buoragit nuppástuhttimiid, ja go min diehtit ja dovdat divrriid de min sáhttit ovdamearkadihte fuobmát dálkkádatrievdademiid ja iežá váikkuhanfáktoriid, dadjá Jörgen Nalisvaara.
Geahča ášši oasi dás bajábealde, de beasat gullat eanet manin leat gávdnan nu ollu ođđa slájaid Hanhinvittikkos.
